Ukrajinski Parlament smijenio Janukoviča – Julija Timošenko kandidat za predsjednika
23. Februar. 2014. u 3:17

Ukrajinski parlament izglasao je da predsjednik Viktor Janukovič više ne može da vrši svoju funkciju, a vanredni  izbori zakazani su za 25. maj, javio je BBC. Za ovakvu odluku glasalo je 328 od 442 poslanika u Parlamentu. Stranka predsjednika Janukoviča ima 165 poslanika u Parlamentu. Viktor Janukovič je iz Kijeva otišao u Harkov, gdje je danas održan Kongres proruskih regiona. Tamo je izjavio kako ne priznaje niti jednu odluku Parlamenta, a za ostavku predsjedavajućeg Parlamenta rekao je da je iznuđena. U nastupu na televiziji predsjednik je demantirao informacije da je podnio neopozivu ostavku. Predsjednik, nije jasno da li je već bivši ili još uvijek aktuelni, izjavio je za jednu prorusku TV iz Ukrajine, da je pokušan atentat na njega. Tvrdi kako je pucano na vozilo u kome se nalazio, ali da na sreću nema poginulih i povrijeđenih. Odmah potom, kako prenose ukrajinski mediji, predsjednik Viktor Janukovič pokušao je avionom da otputuje u Rusiju, ali ga je u toj namjeri spriječila granična policija. Ovo je izjavio predsjednik Ukrajinskog parlamenta Oleksander Turčinov. “On se trenutno krije negdje u oblasti Donjecka”, proruskom gradu na istoku Ukrajine odakle je porijeklom”, rekao je Turčinov, kako prenosi agencija Interfaks.